ESKAINTZEN DUGUNA
ELKARLANERAKO ESPAZIOAK eta BALIABIDEAK.
Profesional eta entitate ezberdinek beren eguneroko jarduna garatzeko espazio egokituak ditugu: bulego partekatua, bilera gelak, formazio gela, areto nagusia, egongela eta sukaldea, armairuak, postontziak, internet konexioa, fotokopiagailua eta inprimagailua, eskanerra, garbiketa zerbitzua, segurtasun sistema eta abar. Ezagutu itzazu! Hernaniko Elkarlan Sorgunearen ordutegia astelehenetik igandera bitartean 07:00etatik 22:00etara da.
EKINTZAILETZA ZERBITZUAK.
Zure proiektua martxan jartzen eta garatzen lagunduko dizugu. Ekinean: Zure enpresa sortzeko formazio eta aholkularitza zerbitzu pertsonalizatua. KoopFabrika: Ekonomia sozial eraldatzailea eta ekintzailetasun soziala sustatzeko programa.
Enpresa zerbitzua: enpresen heldutasuna, garapen integrala eta erantzunkidetasun soziala bermatzea helburu duen zerbitzua, modu horretan beren lehiakortasuna, jasangarritasuna eta berrikuntza ahalbidetuz.
KOMUNITATEAREN DINAMIKAK.
ITUROLAren motorra bere komunitatea da, eta ahalduntze kolektiboa helburu izanik, ekintzaileen arteko ezagutza eta elkarlana sustatzeak berebiziko garrantzia du guretzat. Horrekin batera, proiektu bakoitzak bere potentzialtasun osoa garatzeko dituen beharrak identifikatu eta horien araberako talde dinamikak antolatzen ditugu. Gure komunitatea baina, ez da lau pareta hauen artean dagoena, baizik eta eskualdean ditugun pertsona, eragile eta gainontzeko enpresa dira gure harreman esparrua, hauekin gzutiekin harremanatzeko proiektuak eta dinamikak sustatzen ditugularik.
FORMAZIO SAIOAK.
Lana, zein bizitza bera etengabeko ikasketa prozesu integral bezala ulertzen ditugu, eta ekintzaile zein entitateen beharren araberako formazio saioak eskaintzen ditugu. Jakintza da garapen sozioekonomikoa sustatzeko baliabiderik garrantzitsuena, eta berrikuntza prozesuak ezberdinen arteko elkarrekintzatik eratortzen direnez, eskualdean ditugun baliabide guztiak artikulatzea da gure helburua. Horrenbestez, eskualdean ditugun jakintza esparru ezberdinen, bai formalak zein informalak, harremanetan jartzen ditugu modu iraunkorrean. Ezagutzak jaso eta emateko espazioa da gurea.
SAREA.
Eragile sozioekonomikoen arteko kooperazioa bilatzen, eta eskualdeko komunitateen artean sarea osatzen ari gara, ekosistema berri bat sortuz. Ezagutzak eta esperientziak elkarbanatuz, jakintza biderkatu eta sinergiak handitzea da asmoa. Era horretara, parte hartzen duten proiektuen bideragarritasuna bermatzea, eta tokiko ekonomia suspertzea bilatzen dugu. Horretarako, gero eta sare zabalagoa ehundu nahian, eskualdean daude eragile ekonomiko, sozial eta administratiboekin harremana egituratzen ari gara.
NOLA FUNTZIONATZEN DUGU?
DENBORA BANKUA ETA KONPROMEZUA
Inguruko behar ekonomiko eta sozialak asebetetzeko konpromezua dugu, eta gure komunitatearen inplikazioa da ITUROLAren indargunerik nagusiena. Ekintzaileok, proiektu berritzaileetan parte hartzeko prestutasuna dugu, eta baita gure denbora, gaitasunak eta ezagutzak guztion eskura jartzekoa ere. Horrela, Elkarlan Sorguneko baliabide eta zerbitzuak ez ditugu dirutan ordaintzen, baizik eta komunitateari itzulera soziala egin ahal izateko lan ordutan.
GOBERNANTZA DEMOKRATIKOA
ITUROLAren kudeaketan ekintzaileok rol aktiboa dugu. Horrela, eguneroko zailtasunak eta etorkizuneko erronkak elkarrekin hausnartu eta erabakitzen ditugu, parte hartze integrala bultzatuz, eta eredu autokudeatuan sakonduz. Horretarako, hilean behin ITURBILERAK egiten ditu, zeinetan, proiektuaren norabide orokorra adostu,eta ezerginak elkarbanatzen ditugu. Bestetik, gai zehatzen inguruko bazordeak ditugu. Hauen bidez, espazioaren eta proiektuen eguneroko zereginak kudeatzen ditugu.
SORKUNTZA KOLEKTIBOA
Berrikuntza lortzeko, esperimentazioa eta sormena ezinbesteko ezaugarriak direla sinesten dugu, eta horiek kolektiboki lantzeak urrunago garamatzala aldarrikatzen dugu. Horregatik, proiektuak guztion artean garatzen ditugu, azken batean, ideia, ikuspuntu eta ekarpen anitzek aberastu egiten baikaituzte. ITUROLA, ideia, proiektu eta errealitate berrien sorkuntzarako laborategia da, elkarlanean, jendartea eta lurraldea eraldatzeko baliabide partekatua sortzen ari garelarik.
GURE BALOREAK
Bizitza eta pertsona erdigunean jarriko dituen lan eredua sortzen ari gara, norberaren garapen pertsonala eta profesionala uztartzea ahalbidetu, eta inguruarekiko harremana zainduko duena. Hau da, gure eguneroko jarduna eraikitzailea izatea da gure xedea, inguruko behar kolektiboei erantzungo diona eta jendarte justu eta parekide baterantz gerturatzen lagunduko diguna. Horretarako, guztion elkarlanean eta saretzean sinesten dugu. Azken finean, bizitza duin baten aldeko apustua da gurea, bidean ikasiz eta, batez ere, gozatuz.
